საზოგადოებისთვის
ცნობილ რამდენიმე ადამიანს ტელეფონით დავუკავშირდი და გავარკვიე - ცხელ
ზაფხულს ვინ, სად და როგორ ატარებს. დასასვენებლად გამგზავრებული ცნობილი
სახეები დედაქალაქში დაბრუნებას არ ჩქარობენ (ყოველ შემთხვევაში, ისინი,
ვისაც მე დავეკონტაქტე), მაგრამ არც თბილისში დარჩენილები გრძნობენ თავს
ცუდად...
ნინო ჩხეიძე:
- ამჟამად ბათუმში
ვარ. ოდესიდან გუშინ გამოვემგზავრე. იქ კონცერტი მქონდა. თან, დასვენებაც
მოვახერხე, რადგან იქ 4 დღე ვიმყოფებოდი. ოდესა ძალიან მიყვარს. იქ
პირველად 3 წლის წინ ვიყავი - სოლო კონცერტი მქონდა. ოდესაში
არაჩვეულებრივი ქართული დიასპორაა - ძალიან თბილი ადამიანები არიან!.. მალე
ისრაელში გავემგზავრები - კონცერტი მექნება. შემდეგ დასასვენებლად,
თურქეთში წავალ, თურქეთიდან - პარიზში.
- ბათუმში დროს
როგორ ატარებ?
- ბათუმი ძალიან გალამაზებულია. ბევრი ახალი
კლუბი, კაფეა. მგონია, რომ მთელი თბილისი აქ არის.
- ეს,
ცოტა არ იყოს, დამღლელი ხომ არ არის?
- არა, რატომ?! ჩემი
მეგობრები არიან... კარგად ვერთობი.
- გვითხარი - როგორ
ერთობი?
- ალბათ - ისე, როგორც ყველა: დილით პლაჟზე გავდივართ,
შუადღისას ცოტას ვისვენებთ, საღამოს ისევ ვიკრიბებით.
-
წყლის ისევ გეშინია?
- კი, ზღვაში არ შევდივარ. დილა ჩემთვის
ტანჯვაა: ხშირად, როცა ყველა ზღვაზე მიდის, მე შინ ვრჩები და აღარ ვიცი, რა
ვაკეთო. ამ შემთხვევაში, ვცდილობ, ინტერნეტში შევიდე და ამით გავერთო.
-
ბათუმში მეუღლესთან ერთად იმყოფები?
- კი, ჩემს "გრაფიკში"
ყველგან, მასთან ერთად ვარ. სადმე მარტო რომ წავიდე, ეს ჩემს მეუღლეს არ
უყვარს. დასასვენებლად მარტო არც არასდროს ვყოფილვარ. პრინციპში, ამის
საწინააღმდეგო მეც არაფერი მაქვს - მეუღლე ხელს არ მიშლის (იცინის)...
-
შენი გოგონა, მარიკო სად ისვენებს?
- რამდენიმე დღეში ჩემს
მშობლებთან ერთად ქობულეთში გაემგზავრება...
კაბუ:
-
დედაქალაქში ვისვენებ, რომელიც ძალიან მიყვარს, ვგიჟდები მასზე: მშვიდი,
წყნარია, ქუჩებში ძალიან ცოტა მანქანა მოძრაობს... სახლში ვარ. გარეთ
ხშირად არ გავდივარ, რადგან ძალიან ცხელა.
- დასასვენებლად
გამგზავრებას არ აპირებ?
- ცოტა ხანში აჭარაში წავალ.
ჯერჯერობით სპექტაკლის პრემიერისთვის ვემზადებით.
-
საერთოდ, დასასვენებლად სად მიდიხარ ხოლმე?
- ამას ზაფხულში
ვგეგმავ. წელს ზღვაზე წასვლა დავგეგმე. იქიდან რომ დავბრუნდები, ალბათ,
მთაში წავალ...
ნანიკო ხაზარაძე:
-
დედაქალაქში ვიმყოფები, სამსახურში დავდივარ... ჯერჯერობით სიცხეს არ
შევუწუხებივარ, რადგან სამსახურში ძალიან გრილა.
-
დასასვენებლად სადმე წასვლას ცოტა ხნით მაინც არ აპირებ?
-
არა, შვებულება არ მაქვს.
- საერთოდ, დასვენება სად უფრო
მეტად გიყვარს?
- იქ, სადაც თავს კარგად ვიგრძნობ, - სულერთია!
-
მაინც?..
- მართლა სულერთია... შარშანაც ვერ დავისვენე, ვერც
წელს ვისვენებ. ფაქტობრივად, დასვენება აღარ მახსოვს, რა არის (იცინის).
ზუზუ
(ზაზა ბეჟაშვილი):
- გონიოში ვისვენებ - ძალიან ლამაზ სახლში
და ძალიან კარგად! ზღვის ნაპირი, მეგობრები... ყველაფერი მაქვს, რაც
დასვენებისთვის მჭირდება. დაღლილი ვიყავი და დავმშვიდდი. თბილისში
დაბრუნებას ჯერჯერობით არ ვაპირებ, კარგად ვარ!
- გონიოდან
გადაადგილებასაც არ აპირებ?
- მეგობრებთან ერთად, ბათუმში
ხშირად მივდივარ. სექტემბერში ბაქოში პრემიერა მაქვს და საზღვარგარეთ
გამგზავრება მომიწევს. ასე რომ, კიდევ თითქმის ერთი თვის განმავლობაში აქ
დავრჩები.
- გონიოში როგორ ერთობი?
- დილით
ზღვაზე ვერ მივდივარ, რადგან ძალიან მიყვარს ძილი. გვიან ვიღვიძებ, ყავას
ვსვამ (იცინის)... შემდეგ ზღვაზე გავდივარ. ჩემი ზოგი მეგობარი ბათუმშია,
ზოგი - კვარიათში. გართობას წინასწარ არ ვგეგმავთ, ყველაფერი სპონტანურად
ხდება. მაგალითად, ახლა მე, თეა გობეჯიშვილი და ნიკა ლომიძე ბუკნარში
"ბარბექიუს" მოწყობას ვაპირებთ.
ნიკა არაბიძე:
-
ამჟამად გურიაში ვიმყოფები და ძალიან კარგად ვისვენებ, რაც მთავარია -
წყნარად ჯერჯერობით, მაგრამ ცოტა ხანში ზღვაზე წავალ. დღეს ქუთაისში
მივდივარ, რადგან "ტორპედოს" თამაშია და უნდა ვუგულშემატკივრო!
-
გურიაში დროს როგორ ატარებ?
- უპირველეს ყოვლისა, მოწყენის
საშუალებას ჩემი შვილი არ მაძლევს. აქ ჩემი ახლობლებიც არიან და კარგად
ვერთობი: მდინარეზე დავდივარ, ვთევზაობ... საინტერესოდ ვისვენებ.
-
როგორც აღნიშნე, ზღვაზე წასვლასაც აპირებ. მზეზე გარუჯვა გიყვარს?
-
მიყვარს, მაგრამ მზე მაინცდამაინც კარგად არ მეკიდება (იცინის).
-
აქტიური დასვენება გიყვარს?
- აქტიურიც და პასიურიც მღლის.
ამიტომ ვცდილობ, ორივენაირად დასვენება მოვასწრო.
ნინო
ბაშარული:
- ისე მოხდა, რომ წელს ბავშვებისთვის ვარ
"გადადებული": შვილთან და დისშვილებთან ერთად, ქობულეთში, ფიჭვნარში
ვიმყოფები. ეს ჯანმრთელობისთვის ერთ-ერთი საუკეთესო ადგილია, მაგრამ თავად
მაინცდამაინც ვერ ვისვენებ (იცინის).
- რატომ? ძალიან ცელქი
ბავშვები არიან?
- უცელქესი (იცინის)!
- თავად
სად ისვენებ ხოლმე?
- სარფში.
- წელს სარფს
ვერ ესტუმრები?
- არა მგონია. მთლიანად ბავშვებზე "გადავერთე".
ალბათ, 10 დღით რაჭაში წავალ.
- ნინო, მეგობრები როგორ
ერთობით?
- ზღვაზე ერთად მივდივართ, წყალში ნავებით შევდივართ,
მოლუსკებს ვიჭერთ, ვთევზაობთ. რაჭაში სოკოებს ვკრეფთ ხოლმე... ერთი
პერიოდი "ვსერფინგობდით" კიდეც.
- ექსტრემალური სპორტი
გიტაცებს?
- ძალიან! ბოლოს და ბოლოს, ყოფილი სპორტსმენი ვარ!
-
სპორტის რომელ სახეობას ფლობ?
- 7 წლის განმავლობაში მხატვრულ
ტანვარჯიშზე დავდიოდი.
- მზეზე გარუჯვა თუ გიყვარს?
-
კი, ძალიან! ერთადერთი, რაც ბავშვებმა მაცადეს, ისაა, რომ "გარუჯვის"
საშუალება მომცეს და "მულატკასავით" ვზივარ.
- მზისგან
კანის დამცავ საშუალებეებს იყენებ?
- წელს - არა: "ზაგარი"
ნელ-ნელა მივიღე. აღარ დავიწვი. ერთადერთი, "ბრონზის" შემცველ კრემს
ვისვამ.
- დასვენებასა და სიმღერას ერთმანეთს თუ უთავსებ?
-
ფიქრით მანდ ვარ... 2 სერიოზული პროექტის განხორციელებას ვაპირებ.
ეთო
ყორღანაშვილი
ჟურნალი ”გზა”
(გამოდის ხუთშაბათობით)
მთავარი » 2010 » აგვისტო » 22 » როგორ ერთობიან ცნობილები ცხელ ზაფხულში
2:28 PM როგორ ერთობიან ცნობილები ცხელ ზაფხულში | |
წყარო/Source: http://www.ambebi.ge | |
|
სულ კომენტარები: 0 | |